Perlubygg með arfasósu
Þessi réttur nýtur ávallt mikilla vinsælda á hlaðborði Móður Jarðar í Asparhúsinu í Vallanesi, enda ber rétturinn með sér ferskleika sumarsins. Í loka þættinum “Veislan” á Rúv komu þeir Gunnar Karl Gíslason, matreiðslumeistari, og Dóri DNA í skemmtilega heimsókn í Vallanes til að skoða staðinn og njóta veitinga. Þeir áttu gott spjall við Eymund og Eygló bændur í Vallanesi um kornrækt og íslenska matargerðarlist og var boðið upp á ferskan og léttan rétt sem m.a. innihélt Perlubygg með arfasósu.
Perlubygg frá Móður Jörð – 4 dl
Ferskur og skolaður haugarfi 300 g
Eplasafi 2 dl
Repjuolía frá Móður Jörð, 1 dl
Flögusalt frá Saltverk og nýmalaður pipar
Sjóðið Perlubygg Móður Jarðar skv leiðbeiningum á pakka. Sigtið vatnið af og setjið til hliðar.
Setjið arfann og önnur innihaldsefni í matvinnsluvél, blandið vel. Blandið saman við soðið byggið. Smakkið til með salti og pipar. Stækkið uppskriftina af sósunni ef þið viljið hafa mikinn safa í réttinum. Sósuna má einnig geyma í ísskáp til síðari nota.
