Asparhúsið í Vallanesi var reist 2016 úr timbri sem aflað var úr skógrækt staðarins.   Húsið er byggt úr ösp sem og öll húsgögn.

Asparhúsið var reist í þeim tilgangi að skapa býlinu miðju með samkomustað til að njóta afurðanna sem ræktaðar eru eða framleiddar í Vallanesi.  Húsið er helsta afurð skógræktarinnar á staðnum en það er að  uppistöðu úr íslenskri ösp sem plantað var í Vallanesi árið 1986.  Húsið er teiknað af Albínu Thordarson arkitekt, en húsgögn og innréttingar eru einnig úr ösp og sáu handverksmenn á Seyðisfirði um smíðina, en RoShamBo, hópur listakvenna á Seyðisfirði sá um innanhúshönnun.  Pallar í kringum húsið eru úr lerki.

Asparhúsið hefur sannað gildi sitt sem hlýlegur samverustaður það sem boðið er uppá grænmetisfæði en þar er rekið kaffihús og verslun á sumrin.  Á ræktunartímabilinu geta gestir nálgast ferskt grænmeti eftir því hvað er uppskorið á hverjum tíma.