Jarðeplahátíð var haldin hjá Móður Jörð í Vallanesi við góðan orðstír í byrjun október.  Undanfarið hefur Móðir Jörð unnið að því að auka tegundafjölbreytni í kartöflum enda hafa kartöflur skipað mikilvægan sess í ræktun staðarins allt frá árinu 1752, eða hvað ?  Hátíðinni var einmitt ætlað að kanna forsendur þess betur, skoða ræktunarsögu í Vallanesi og víðar á Austurlandi og fjalla um kartöflur í víðum skilningi enda mikilvægt hráefni í íslenskri matargerð.   Hátíðin var haldin í samstarfi við Matarauð Austurlands, Gunnarsstofnun og veitinghúsið Nielsen á Egilsstöðum.  Útkoman var fróðleg og lífleg sögustund Skúla Björns Gunnarssonar á Skriðuklaustri blandað við  glæsilega matargerðarlist en Kári Þorsteinsson, matreiðslumeistari á Nielsen, fékk það hlutverk að töfra fram rétti úr ólíkum tegundum af kartöflum sem spönnuðu heila máltíð, allt frá lystauka til eftirréttar.  Kóngabláar, Blálandsdrottning, hvítar og rauðar möndlur munu bætast við í flóru Móður Jarðar þegar fram í sækir, en eftir sem áður verða Rauðar íslenskar og Gullauga fastir liðir í flórunni.  Þær eru ávallt fáanlegar í þessum verslunum;  Brauðhúsið í Grímsbæ,  Frú Laugu, Gott og Blessað, Melabúðin og Fjarðarkaup, auk netverslunar Móður Jarðar.  Allar kartöflur ársins 2020  voru ræktaðar á Pálshúshóli, sama stað og upphaf grænmetisrætkunar í Vallanesi er talið vera í kringum árið 1752.